專題

【啱人事】 啱Channel創辦人︰員工與老細天生敵對 如何減少員工對你的討厭度

現時閒時上網看影片,就尤如以前看電視一般輕鬆普遍,不同的網結影片分享平台亦愈來愈多,而啱Channel就是當中一員,facebook page已超過34萬like,平台上的影片更是不少人每天必看的「精神調劑品」,無論短劇、Vlog、微電影、廣告等都得到一班觀眾支持,這都全賴一眾有創意的員工及身為啱Channel揸fit人的曾達恩(Tommy)的帶領。在很多人眼中不懂做生意的Tommy,在管理員工及拍出高like數影片上,就有自己一套心得,讓啱Channel不斷輸出新的活力。

修讀數碼媒體的Tommy與不少人一樣也是喜歡拍攝影片,畢業後也從事廣告製作,數年前想建立一個平台可以分享私下創作的影片,最後在13年與朋友一同建立了「啱Channel」,兼顧工作之餘亦開始上載不同的影片作分享。

去到18年,隨着平台發展,Tommy開始由兼職轉為全職營運啱Channel,身份上由幫人打工,到現時要自己管理公司,Tommy表示是很大挑戰,「今年最大嘅轉變係由創作者變為要管理埋公司營運,好多方面需要平衡,公司營運資金、公司發展、影片創作方向及同事嘅工作情緒等。」

減低同事憎你的程度

  現時啱Channel有10名全職員工,對於與同事間相處的方法,Tommy有自己的看法,「呢個世界所有同事都係憎老細,因為角色上係有衝突,而我亦冇可避免咁畀同事憎嘅,只係憎嘅程度唔同,而為咗令工作環境和諧啲,只可以互相遷就。公司要運作免不了好多行政決策,其實會易令同事有怨言,所以我盡量做每一個決定時,都向同事講番咁做嘅原因,避免令人覺得我只係個人意願,令大家易啲接受。」

難跟like數去拍片

一個以創作影片為主的平台,離不開觀眾的支持,而Tommy認為要拍出有共鳴感的影片是關鍵,「到現時這一刻我哋都保持1日1片,我哋每星期都會開會,各同事都會提供自己嘅諗法,然後傾接下來嘅拍攝方向,我哋經過1年嘅觀察,覺得好難跟住觀眾嘅喜好去拍攝,邊啲片多啲like,我哋就去拍邊類片,其實唔太現實,冇邊類型片保證觀眾一定鍾意睇。反而我會要求同事用番自己最有共鳴嘅事情去拍片,咁樣條片唔會咁死板,有助保持到觀眾嘅新鮮感。」

除了顧及觀眾外,公司要正常運作,免不了要煩惱收入,Tommy表示需要共同努力,「我哋主要嘅收入來源係廣告,就算段片好多人睇但係冇收入嘅,我哋都係會玩完。但係以前啲觀眾一見你賣廣告,就會負評或鬧你,我哋希望令明白觀眾我哋要有收入,先可以維持拍到啲娛樂影片。例如之前拍咗條Subway影片,好明顯係一條廣告片,我哋用咗男女朋友間相處嘅小細節,帶出廣告訊息,見到啲觀眾反應好好,覺得夠貼地及有共鳴感,仲叫我哋拍多啲呢類嘅廣告片,會見到觀眾與我哋都一齊成長緊。」

Tommy認為自己不是一個出色的老闆,只是堅持信念做下去,「可能未必太多人認可我營運公司嘅方法,但我一直認為只要做得好平時嘅創作,一定會有廣告商搵我哋,而唔使我哋去搵得咁辛苦,可以將精力放喺創作出更多好嘅影片上。只要睇到歡眾嘅留言支持,呢啲都係令我哋做落去嘅動力。」

Tags
Show More

相關文章

Close