專題

【專題訪問】本土新創運動服裝品牌,開拓新銷售點,成功1年回本

說起運動服裝品牌,相信大家腦海最快聯想起的會Nike、Adidas、Under Armour等國際品牌,而這些亦是港人優先的購買選擇,可以說香港的運動服裝市場已被大品牌佔領。90後的尤朗(Jason)卻有自己的看法,認為高質的本土品牌仍會有支持者,他在18年創立運動服裝品牌Zyphr,標榜設計及質量並重,嘗試在健身室設銷售點,成功打開市場,在紅海中找到屬於自己的藍海。

Zyphr是一個香港運動服裝品牌,成立剛接近1年,創辦人Jason表示已收回投資成本,達至收支平衡,說起最初創立的理念,他說︰「香港嘅運動服裝市場大致畀國際大品牌瓜分,但產品一係講求設計,一係就着重功能,兩者兼備嘅唔多,而本土又好似冇乜設計及質量都受人青睞嘅品牌,我覺得中間有個生存空間,想發展出實用,及令人望落係有design嘅香港品牌,而且售價係唔使太貴嘅。」

大學修讀marketing的Jason,未畢業時已開始着手準備Zyphr的創立,「自己去構思品牌概念、設計產品、搵合適物料及廠家等,試過過100款布料,最後先揀到款有彈性之餘,吸濕及排汗能力都高嘅布料。品牌定位係畀鍾意做運動嘅人,可以符合佢哋運動要求,而且外觀設計係好睇嘅。」

親自監控保質量

Jason明白產品質量的高低,決定了能否得到客人支持,為了造出好的產品,Jason親自到內地與廠家聯絡,「前後搵咗20幾間廠,都有叫廠家造過樣辦去試,但係要留意番每間製衣廠都有自己的專長,可能係褲、上衣都已經唔同,但係啲廠家為求接訂單,乜都話得,所以要自己去了解番。現時我哋男裝、女裝及客製服裝係分別搵3間廠去整,咁樣充分運用到各間廠嘅所長之處,出嚟嘅產品亦符合我哋預期。」

最初Jason將產品放在網上銷售,但是銷情不如理想,「可以話1件都賣唔出,我哋Zyphr嘅一大賣點係高質量,但網上賣冇人會知你好唔好,要有地方畀人摸上手先得,要搵啲實體零售點畀客人感受。」

健身室上架有起色

但是新品牌較難在運動用品專門店上架,於是Jason就大膽嘗試新出路,「一起步去搵連鎖運動用品店傾上機冇乜可能,我就嘗試cold call市場上各間私人gym room,希望可以擺喺gym room內賣。我免費提供啲產品畀佢哋啲教練試用一段時間,然後又提供客製服務,令佢哋更了解我哋嘅品牌及產品。佢哋都滿意我哋嘅產品,亦願意嘗試畀我哋試吓,慢慢打開呢個市場。」

現時Zyphr成功在十多間私人健身室設有銷售點,包括清水灣鄉村俱樂部、Fitt Pub等個別健身中心都有得賣。而成功設置銷售點後,憑着高質量、不錯的服裝設計及合宜的價錢,吸引到一班愛好運動的人士歡迎,「原本以為會係男性客多,點知會係女士會較鍾意買運動服裝。」

接下來Jason會嘗試參考香港市場的發展模式,開拓鄰近地區的市場,「嚟緊呢年我哋會推出更多服裝款式,而設計上都有聽從客戶嘅意見,會推出新系列,將品牌打造得更成熟。同時我哋打算與新加坡、台灣等地區嘅gym room傾合作,令我哋嘅產品可以進入當地市場。」

 

Tags
Show More

相關文章

Close