你曾經有很想去實現的事情嗎？有多想去做？最後有去做嗎？相信不少人心中或多或少有想做的事，但可能有不同的理由及困難，最終沒有去完成。相信生命影響生命的Brian（車志健），想把自己的故事及經驗透過演講傳遞出去，於是開展了激勵演講家的事業路，把當時無人認識甚麼是激勵演講家，Brian通過自身的努力，及網絡的力量，一步一步推廣出去，現時已成功影響數以百萬的人，達到自己目標之餘，也幫助別人找到自己的目標。
作為Brian Cha Motivation創辦人的Brian，是一名激勵演講家，他表示不少人對激勵演講家的工作有疑問，他說︰「簡單咁講，我工作就係激勵你，有人會覺得激勵呢樣嘢可有可無，唔太迫切，但係呢個係領導者需要有嘅一項能力，可能你會遇到一班冇活力嘅同事，或者自己都冇目標，呢個時候激勵就可以幫到你。我會分享我嘅故事及經驗，改變聽眾嘅想法，令聽眾由唔相信自己變成有自信，從而讓成績有所提升。」
除了現場演講外，Brian還會做企業培訓，1對1的CEO私人課程，還會為創業者提供導師服務，「職場上有啲人對前路唔太清晰，有啲係事業停滯不前唔知有乜嘢方法向前。會有公司激請我去為佢哋嘅員工做演講，而我亦會舉辦唔同主題嘅演講畀人報名參加，我希望透過我嘅演講，令受眾可以得到啟發，得到改變。」
打破思想限制成就自我
修讀營養學的Brian，一直從事着健身教練的工作，直到13年，他嘗試作一些突破。「當時事業發展進入一個樽頸位，想搵突破，同朋友傾開偈，傾到不如試吓挑戰建力士世界紀錄；最後成功挑戰12小時內，揮桿擊出一百碼外嘅高爾夫球的世界紀錄」
而在挑戰建力士世界紀錄的過程中，啟發了Brian開展新的事業道路，「啲人聽到我話想挑戰建力士世界紀錄時，大部分都係講冇可能、唔得嘅，而當我真係成功挑戰時，我感覺到改變咗唔少人嘅想法。然後，零零散散有公司搵我做分享，喺過程中，見到我所講嘅故事對有啲人係有幫助，激勵到人，而我腦海中其實仲有好多諗法想與更多人分享，想改變更多嘅人，於是開始諗方法將演講變成我嘅工作。」
善用網絡成能力槓桿
最初Brian想盡方法，讓自己成為一名激勵演講家，創立Brian Cha Motivation，「當時市場上冇呢個職業，想求職都做唔到，於是我就自己創業，走去印咭片，上面印住我個名及激勵演講家嘅title，然後就拎住啲咭片周圍派，派咗過千張出去，不過搵我嘅人唔多，始終我嘅知名度唔夠。喺15年我再成功挑戰多一個建力士世界紀錄；同時利用網絡力旺做宣傳。」
要找到合適客戶群，第一步就是要讓人認識，Brian認為網絡就是一件十分有效的宣傳工具，「你有能力但都要畀人知道先有價值，我哋堅持每日都喺自己平台上分享有用嘅資訊出去，例如銷售、溝通及心理等方面可以讓人進步的方法，但唔會去hard sell，我哋抱住嘅觀念係點樣幫到其他人，有啲人會努力咁諗點去賺錢，有趣嘅係我哋諗有咩服務及產品可以幫到人時，反而得到唔少生意合作嘅機會。」
現時Brian的演講已去到十多個國家，網上的學生已超過2萬，透過網絡的力量每月接觸超過300萬名成眾，Brian認為這些都是一步一步堅持所得來的。
目標使人有動力去進步，Brian也有他的展望及目標，同時正想方設法去實現，「希望將激勵演講家呢樣嘢帶畀全球華人認識，可以有朝一日，啲人提起華人嘅激勵演講家時，第一時間就諗起我。以我現時嘅演繹方式，將事業推展到更進一步，成為一位世界級嘅演講者。」
